अनौपचारिक क्षेत्रमा सामाजिक सुरक्षा भत्ता दिन सरकारले नचाहेको जिफन्टको आरोप

प्रमुख प्रतिपक्ष दल नेकपा (एमाले) निकट मजदुर संगठन नेपाल ट्रेड युनियन महासंघ (जिफन्ट)ले अनौपचारिक क्षेत्रमा सामाजिक सुरक्षा भत्ता दिन सरकारले नचाहेको आरोप लगाएको छ । अन्तर्राष्ट्रिय श्रमिक दिवसको अवसर पारेर जिफन्टले शनिबार काठमाडौंमा पत्रकार सम्मेलन गरी सो आरोप लगाएको हो । अनौपचारिक क्षेत्रमा पनि सामाजिक सुरक्षा भत्ता लागू गराउनका लागि कार्यविधि बन्दै गरेको भएपनि सरकार त्यसका लागि तयार नभएको पाइएको जिफन्टका अध्यक्ष विनोद श्रेष्ठले बताउनु भयो । उहाँले मजदुरलाई भन्दा सो भत्ताबारे सरकारलाई बुझाउन आफूहरुलाई गाह्रो भईरहेको टिप्पणी पनि गर्नु भयो ।
जिफन्टले सामाजिक सुरक्षा भत्ता वितरणको विरोधमा केही मजदुरहरु आफै लागेको भन्दै आपत्ति जनाउँदै आएको छ ।
यसैबीच, जिफन्टले भोली (१८ गते) अन्तर्राष्ट्रिय श्रमिक दिवसको अवसर पारेर काठमाडौंको भृकुटीमण्डवमा एक कार्यक्रमको आयोजना गरेको छ । पूर्वप्रधानमन्त्री एवम् एमाले अध्यक्ष केपी शर्मा ओलीले सो कार्यक्रमको उद्घाटन गर्नु हुने पनि जिफन्टले जनाएको छ ।