पुष १८,काठमाडौं । शेयर बजार मापक नेपाल स्टक एक्सचेन्ज (नेप्से परिसूचक) साताको पहिलो कारोबारको दिन आइतबार उच्च अंकले वृद्धि भएको छ ।
अघिल्लो साताको बुधबार सामान्य अंकले सुधार आएको नेप्से परिसूचक साताको पहिलो कारोबारको दिन आइतबार ६० दशमलव ४१ अंकले वृद्धि भएको हो । पछिल्लो समय शेयर बजारमा निरन्तर रुपमा उतारचढाव आउन थालेको छ । आज ठूला कम्पनीको शेयर मापक गर्ने सेन्सेटिभ इण्डेक्स पनि २ दशमलव २९ प्रतिशत, फ्लोट इण्डेक्स २ दशमलव ३९ प्रतिशत र सेन्सेटिभ फ्लोट इण्डेक्स २ दशमलव ४६ प्रतिशत बढेको छ ।
आज कारोबारमा आएका २४० कम्पनीको ७१ लाख ६० हजार ९८३ कित्ता शेयर ४ अर्ब १२ करोड ६९ लाख ८० हजार रुपैयाँ बराबरको शेयर कारोबार भएको छ । गत बुधबार ३ अर्ब ६२ करोडको शेयर कारोबार भएको थियो । बुधबारको तुलनामा आइतबारको कारोबार रकममा पनि सुधार आएको हो ।
आइतबार १३ उपसमूहमध्ये म्युचुअल फण्ड उपसमूहको बाहेकका अन्य सबै उपसमूहका परिसूचकहरु बढेका छन् । जसमध्ये उत्पादन तथा प्रशोधन उपसमूहको परिसूचक सबैभन्दा धेरै ५ दशमलव ०८ प्रतिशत बढेको छ । त्यस्तै, निर्जीवन बीमा उपसमूहको परिसूचक ३ दशमलव ५४ प्रतिशत, विकास बैंकको ३ दशमलव ४२ प्रतिशत लगानी २दशमलव १७ प्रतिशत, जीवन बीमा २ दशमलव ४२ प्रतिशत, लघुवित्त २ दशमलव ८८ प्रतिशत र अन्य उपसमूहको परिसूचक २ दशमलव ३ प्रतिशत, बैंकिङ १ दशमलव ९९ प्रतिशत, होटल तथा पर्यटन १दशमलव ४ प्रतिशत र जलविद्युत उपसमूहको परिसूचक १दशमलव ७ प्रतिशतले बढेको छ ।
आइतबार हिमालयन डिष्टिलरीको शेयरमूल्य सबै भन्दा धेरै ९ दशमलव ९९ प्रतिशत बढेको छ । त्यस्तै, मध्य भोटेकोशीको शेयरमूल्य ९दशमलव ९७ प्रतिशत र सूर्या लाइफ इन्स्योरेन्सको ९ दशमलव २९ प्रतिशत बढेको छ । तर यता गोर्खाज फाइनान्सको शेयरमूल्य भने सर्वाधिक ५ दशमलव १२ प्रतिशत घटेको छ ।
आज कारोबार रकमका आधारमा हिमालयन डिष्ट्रिलरीको ४४ करोड ९४ लाख रुपैयाँको शेयर कारोबार भएर पहिलो शीर्ष स्थानमा रहेको छ भने दोस्रो स्थानमा २९ करोड ७० लाख रुपैयाँको कारोबार गरेर नबिल बैंक रहेको छ ।
