कुनै व्यवसायीले चामलको मूल्य बढाएर बेचेको भए सरकारलाई तत्काल अनुगमन गर्न व्यवसायीहरुको आग्रह

वीरगञ्ज उद्योग वाणिज्य संघका अध्यक्ष सुबोध कुमार गुप्ताले पछिल्लो समय खाने तेलको मूल्य बढेको भएपनि चामलको मूल्य नबढेको बताउनु भएको छ । शुक्रबार काठमाडौंमा आयोजित पत्रकार सम्मेलनमा बोल्दै अध्यक्ष गुप्ताले खाने तेलको मूल्य बढेको भएपनि चामलको मूल्य नबढेको बताउनु भएको हो । उहाँले चामलको मूल्य एक महिना अगाडि जुन मूल्य थियो अहिले पनि त्यही मूल्य रहेको बताउनु भयो । कुनै व्यवसायीले चामलको मूल्य बढाएर बेचेको भए सरकारलाई तत्काल अनुगमन गर्न आग्रह गर्नु भयो । अध्यक्ष गुप्ताले नेपालमा अहिलेसम्म एउटा पनि तेल उद्योग नभएको बताउनु भयो । उहाँले भएका केही तोरीको तेल उद्योग समेत बाहिरबाट अन्य तेल आयात गरेर बेच्ने गरेको दाबी गर्नु भयो । तेल पनि विदेशबाट नै आयात गर्नु पर्ने अवस्था भएकाले मूल्य वृद्धिको मार खेप्नु परेको बताउनु भयो ।
त्यस्तै अध्यक्ष गुप्ताले चुनाव नजिदै जाँदा राजनीतिक दल र अन्य संगठनले चन्दा माग्न थालेको बताउनु भयो । उहाँले चन्दा माग्ने र डर देखाउने क्रम बढेकाले सरकारले आगामी दिनमा औद्योगिक सुरक्षाबल बढाउन माग गर्नु भयो। सरकारले अघि उद्योगीलाई थाहै नदिई सुरक्षाबल हटाएको भन्दै अध्यक्ष गुप्ताले यसलाई निरन्तरता दिनुपर्ने बताउनु भयो ।
त्यस्तै अध्यक्ष गुप्ताले नेपाल राष्ट्र बैंकको बस्तु आयातमा लागु गरेको सतप्रतिशत मार्जिनको व्यवस्थाले व्यवसायीहरुले आयात घटाएको बताउनु भयो । उहाँले अहिले रुस र युक्रेनको युद्धको कारण समेत व्यवसायी थप समस्यामा परेको बताउनु भयो । अध्यक्ष गुप्ताले सतप्रतिशत मार्जिनको व्यवस्था लागु गरेर सरकारले आयातलाई निरुत्साहित गर्न खोजेको आरोप लगाउनु भयो ।